आ. डॉ. विश्वजीत कदम साहेबांचा

डॉ. विश्वजीत पतंगराव कदम यांचं नाव उच्चारताच डोळ्यासमोर उभं राहतं ते अतिशय विनयशील, सभ्य, सुसंस्कृत, उच्च विद्याविभूषित, शिक्षण, राजकारण, समाजकारण अशा विविध क्षेत्रात आपल्या कामाची ठळक ओळख निर्माण करणारं, संकटसमयी स्वतःच्या जीवाची पर्वा न करता धावून जाणारं, सर्वांशी मिळून मिसळून वागणारं, विविध सामाजिक उपक्रमांच्या माध्यमातून तरुणाईच्या ऊर्जेला विधायक वळण देणारं जनसामान्यांना केंद्रस्थानी ठेवून भविष्याचा वेध घेणारं आश्वासक युवा नेतृत्व.

समाजकारणाचा आणि राजकारणाचा समृध्द वारसा लाभलेल्या कुटुंबात आ. डॉ. विश्वजीत कदम यांचा १३ जानेवारी १९८१ रोजी जन्म झाला. राज्याचे ज्येष्ठ नेते, माजी मंत्री आणि भारती विद्यापीठाचे संस्थापक-कुलपती डॉ. पतंगरावजी कदमसाहेब यांचे ते सुपुत्र आहेत. आ. डॉ. विश्वजीत कदम हे स्वतः कॉम्प्युटर इंजिनिअर असून त्यांनी ‘फायनान्स अँड मार्केटिंग’ या विषयात एम.बी.ए. पूर्ण केले आहे. त्यांनी ‘मॅनेजमेंट’ या विषयात पीएच.डी. ही पदवी संपादन केली आहे. आ. डॉ. विश्वजीत कदम ऊर्फ बाळासाहेब हे कॉंग्रेसचे तरुण, तडफदार व धडाडीचे नेते असून, आपल्या कार्यकर्तृत्वाने त्यांनी राज्यात आपली वेगळी ओळख निर्माण केली आहे. संघटन कौशल्याच्या बळावर त्यांनी जनमानसात कॉंग्रेसची पाळेमुळे खोलवर रुजवली आहेत. स्व. डॉ.पतंगराव कदमसाहेबांच्या पावलांवर पाऊल ठेवत ते सामाजिक, राजकीय, शैक्षणिक, सहकार, कला, क्रीडा क्षेत्रात सक्रिय आहेत. राजकारणाच्या पलिकडे जाऊन समाजकारण करण्याकडे त्यांचा कल असतो. ते भारती‌‌ विद्यापीठाचे कार्यवाहक म्हणून काम पाहतात.

सन २०१९ च्या विधानसभा निवडणुकीत १ लाख ६२ हजारांहून अधिक मतांनी निवडून येण्याचा विक्रम त्यांनी केला आहे. तसेच महाविकास आघाडी सरकारच्या काळात त्यांनी अडीच वर्षे सहकार, कृषी, सामाजिक न्याय, अन्न व नागरी पुरवठा, ग्राहक संरक्षण, अल्पसंख्याक विकास व औकाफ, मराठी भाषा खात्यांचे राज्यमंत्री म्हणून काम पाहिले आहे. मंत्रिपदाच्या कार्यकाळात त्यांनी जनहिताचे अनेक निर्णय घेतले, विविध लोककल्याणकारी योजनांची यशस्वीपणे अंमलबजावणी केली. २०१९ मध्ये महाराष्ट्रात अनेक ठिकाणी पूर परिस्थिती निर्माण झाली असताना त्यांनी युद्धपातळीवर बचाव व मदतकार्य करून पूरग्रस्तांना दिलासा दिला. महापुराच्या काळातील त्यांचे काम उल्लेखनीय आहे. डिसेंबर २०२२ मध्ये झालेल्या ग्रामपंचायत निवडणुकीत त्यांनी भाजपाचा धुव्वा उडवून आपला गड अबाधित ठेवला. राजकारण करताना त्यांनी कधीही नैतिक मूल्यांचा, सामाजिक बांधिलकीचा विसर पडू दिला नाही. वर्चस्वाचे नाही तर विकासाचे राजकारण केले. गोरगरिबांच्या डोळ्यातील अश्रू पुसून त्यांच्या जीवनात आनंद पेरण्याचे काम त्यांनी केले. आजही ते स्व. डॉ. पतंगराव कदम साहेब यांच्याप्रमाणे सदैव लोकांच्या मदतीसाठी, त्यांच्या समस्या सोडविण्यासाठी तत्पर असतात.